Jubileumsfest på Tryggheim
Laurdag 19. oktober blir det 100-årsfeiring!
13. oktober 1919 starta «Kinamisjonsforbundets ungdomsskule i Rogaland», som i dag heiter Tryggheim skular. I lokale som skulen leigde, begynte 55 elevar, ein skulestyrar, to lærarar og ei husmor som skulle lage all maten. 100 år seinare – hausten 2019 – starta over 520 elevar på Tryggheim vidaregåande skule og om lag 250 på Tryggheim ungdomsskule.
Laurdag 19. oktober inviterer Tryggheim skular på Nærbø til storstilt 100-årsfeiring.Generalsekretær Øyvind Åsland i Norsk Luthersk Misjonssamband skal halde festtale. Songarane Anne Birgitte Lillebø Bø og Dagfinn Egeland og saksofonisten Glenn Vorhaug skal framføre musikalske innslag. Kjente Tryggheim-ansikt stiller til sofasamtale med tittelen «Då me styrte Tryggheim». Landbruks- og matminister Olaug Bollestad (KrF) og Hå-ordførar Jonas Skrettingland (KrF) er blant fleire som skal helse til jubilanten i løpet av kvelden. Ryfylke Livsgnist kjem for å framføre den spesialskrivne Tryggheim-førestillinga «Vi strekker oss lenger enn langt». Det blir også servering av gryterett og sal av den ferske 100-årsboka i løpet av jubileumsfesten.
